Home Who we are

Who we are

Who we Are

Hi Zion Baptist Church a dirhtu hna hi Burma ram nitlak-chaklei, India, Bangladesh le Burma ram thum tonnak Burma ram chung um Chin miphun kan si. Kum zabu 1900 dih lai March 15,1899 ah American Baptist Mission (ABM) in Rev. Arthur Carson le Lora Carson te nupa Hakha, Chin hills an phak hlan poah cu lawki kan rak si. Lawki in kan rak um lio ah kan pu pa zumhnak le raithawi ning cu Khrifa cawn piaknak he a rak ineih ngaingai caah Rev.A.Carson te nupa thlaici tuhmi zong Pathian nih thluachuah a pek i fawi tein Khrifa biaknak kan rak ilak kho. Kum zakhat chung ah Chin pupa kokek nunphung le lawki zumhning he aa lawh ngai caah milurel 80 % khrihfa ah kan rak ithleng.

Cu caah Chinland cu Burma ram satate le division 14 lak ah amah pakhat te long Christian state ti a si.1988 thawk in ralkap uknak ruang ah ralkap tampi Chinram an hung kai. Porter an kan suai, hranhram in  rian an kan ttuanter, tlaihhrem nih a si, tuk le velh in thawng tiang thlak a si tik ah Chin mipi nih kan celh ti hna lo. Khrifa ram kan si ruangah hoi dang state nak in an kan hrem khun. Cu caah kan runpi in ram kip ah kan zaam, Malay kan phan, India kan phan, Thailand kan phan, kan zaamnak ram ah UNHCR nih a hung kan hlawm. UNHCR tawlrelnak in Norway cozah nih an ram ah dornak nawl a kan pek.

Cu ti cun April 3, 2003 ah Chin milurel 15 cu nikhat te ah Norway ram, Egersund khua kan rak phan. April 20, 2003 in lai holh pumhnak an thawk cawlh. Egersund Kommune zong nih an kan dawt ngai. Milurel kan hung tam deuh caah February 12, 2005 ah Egersund Chin Christian Family (ECCF) tiah min kan rak isak. Pathain thawng in nuva khuasa kan karh caah fanu fapa rosung tete kan hung ngei, aa tthi um tete kan hung um. Khrifa cia kan rak si caah Pathian sin in kan hmuhmi fanu fapa hna Biakinn chuahpi in pastor thlacaam piak kan hung duh tik hna ah ECCF cu Church a rak si lo ruang ah kanmah le siaremnak Biakinn le Pastor kan hung ikawl cio.

Cu caah mah le siaremnak Church ah fa le zawnruah in member ah rak luh cio a rak si. Khrifabu kan rak luhnak hna cu State Church, Methodish Church, Pentecostal Church le Baptist Church hna an si. Bu dang cu kan khua ah a rak ummi long te an si nain Baptist cu kan khua ah a rak um lo caah milurel 8 hi Ålgård Baptist Church ah kan va lut. Um kalnak a rak har deuh caah Ålgård Baptist Church nih zarhpi pumh ah motor in an rak kan lak i an sin ah an rak ka pumh ter tawn. Zarh fatin dawn peng cu an caah a rak har deuh ve caah anmah sin a rak lutmi Baptist member caah Ålgård Baptist Church nih April 22, 2007 ah chungtel 13 caah Egersund Chin Baptist Church (ECBC), Egersund cu dirh piak a rak si.

ECBC a um hnu zong ah member kan luhnak Church cio ipumh dih hnu ah ECCF hruainak in Chin dihlak pumhnak cu rak ngeih peng a si. Kumkhat a rauh hnu ah Egersund um laimi dihlak fonh in hmunkhat ah Church dirh in Pathian thangtthat tti kan duh caah Norway Baptist Union General Secretary Rev.Magnar Maeland kan rak sawm. Cu hnu ah ECCF le ECBC cu April 5, 2008 ah rak ifonh a si i kan min zong  Egersund Chin Church (ECC) ti a rak si. Cu ni thawk cun ECCF pumhnak zong a um ve ti lo. Baptist Union he kan ipeh ko caah Church min zong thla hnih hnu June 28, 2008 ah Zion Baptist Church (ZBC), Egersund tiah thlen a rak si. Atu lio ZBC member dihlak cu 83 kan si.