Home Kan tuanbia

Kan tuanbia

Kan Tuanbia

Thawhkehnak:      Kawlram um miphun dihlak cu tuanba hlat hna nih Mongoloid phun an si ti a si. Mongoloid phun cu Peking lungkua (Peking cave) in an rak sem, BC 300 hrong ah Yellow va hron le Chinlung tlang ah an rak um, ral ruang ah zeimazat cu Tibet ram ah an hung zam, Tibet ram an um lio AD 350 hrong in Tibeto-Burman phun hna cu Buddist luh duh lo ruangah Hukong tlang fiang in kawl ram lei an rak ithon ti a si. Chimholh, titvun le nunning hoih in Tibeto-Burman Chungtel phu ah Pyu, Kayan, Lolo, Naga, Thet, Burma, Kachin le Chin miphun an rak itel, zabu 8 hrong ah kawl le Chin hna cu Irrawady le Chintwin va hron ah khua an rak sak tti cang tiah tuanbia hlat hna nih an langhter.

Kawl pennak le Chin miphun umnak:       Kawl pennak cu AD 1044, Pagan ah Anawrattha nih a rak dirh. Cu ahcun Chin miphun zong kawl he dai tein an rak tlawngtti. Chintwin va hron ah hin tambik an rak um caah an tlawnlennak tiva min tiang zong kha Chintwin tiah an rak auh. Chin ti cu kanmah in aa au kan um lo nain kan pupa min ti a fiannak cu Tuluk ram an um lio in Chin ti an si, AD 1086, Kyiansitta chan Pagan lung ca tial ah Chin miphun ti a si, an umnak tiva zong Chintwin ti a si leng ah Chin suhzua le Chin phaza ti tiang fiang tein a rak um cang.

AD 1056 ah Anawrattha nih Buddish biaknak a luhpi rih ruang ah an rem hoi lo i, Chintwin vahron a chaklei le ni tlaklei ah an rak ithon. Zabu 10 in 14 karlak cu kalay-kabaw rawn le Pantawng tlang in nitlak lei Rakhiang tlanghon ah an rak um. AD 1287 ah kawl pennak cu a rak rawk. Shan penak nih a hun chan caah khuapi zong Ava (Inwah), 1364 ah rak dirh a si. Chin miphun umnak Kalay-kabaw zong ah Shan nih cun an va pen hna, 1374 ah Shan sawbua Kyi Tuang Nyio a rak phan Kalaymyo khuapi a rak ser ti a si.

Chin miphun tlangcung kainak le atu an umnak:                            Shan sawbua cu a phak cangka in sianpahrang inn nganpi le pura a rak sak caah Chin miphun kha hranhran in rian a rak ttuan ter hna. Mah kha an duh lo caah Kalay-kabaw nelrawn cu an chuah tak than hawi. Zabu 14 dongh lei in tlangpar kai hram an rak ithawk, mirang pennak 1887 tiang kum 400 chung zei hehmanh coh lo in an rak um. Kalay-kabaw an um ah nunphung le holh hoih deuh in rak um hna sehlaw a dawh. Tlangpar an kai ah a phu tete in an rak um cio, atu tiang in cu ning cun khuasak cio a si. Zei mawzat cu tlangpar kai lo in a tang chun an um ve, atu Zaw pawl khi sidawh bik an si ti a si. Tlangpar an kai hnu an rak ittheknak hmun hna cu;

  1. Laimi –            Hakha, Thantlang, Matupi le Falam (Chin state) Kale, Kangaw (Burma); Saiha le Longtlai, Mizoram state (India) le Bawmram (Bangaladesh) ah;
  2. Asho-              Rakhaing state, Irrawaty division, Magwe division le Rangoon velchum ah;
  3. Cho-                Mindat le Kanpalet peng-Chin state, Burma ah;
  4. Mizo-              Kale, Tamu (Burma) le Mizoram state (India) ah;
  5. Zomi-Kuki     Tidim, Tonzang peng Chin state , Kalay, Tamu-Mawlaih Sagaing division (Burma) le Manipur state (India) ah;
  6. Meo-khumi-   Paletwah peng Chin state le Rakhiang le Magwe division, Burma ah an si.

Mirang pennak le Thawngttha luhnak:    Mirang cozah nih kawl a lak hnu ah Chin ram cu 1886 in doh hram a thawk ve. Kum nga hnu 1891 ah Chin ram he Mizoram he Minipur he a lak dih. 1896 ah kan nunphung le phunglam (Custom and culture base) chirhchanh in Chin hills, Lusei hills, Naga le Manipur (Kuki) dihlak uknak phung“Chin Hills Regulation Acts, 1896” an rak ka ser piak. Cu upadi nih kan min Chinkha a fehter,. Cu thawk cun vulei tuanbia ah chin aa thawk ve, miphun dang he cawh lo in a dang tein an rak kan uk.

Chin Hills Regulation Acts, 1896 nih a rak huapmi cu Nagaland, Mizoram, Manipur Hills in India, Chin State, Naga Hills or Khamti District in Sagaing Division in Burma le Chittagong Hills Tract in Bangladesh a rak si. Kan nunphung le kan dir hmun an rak zoh tik ah Khrihfa zumhnak he aa rak neih tiah an rak kan hmuh piak caah Mission rianttuan an rak kan sawm piak hna. Kanmah nichuah lei Chin ram caah a hmasa bik ah an kan sawm piakmi hna cu Methodist an rak si. Cu hnu ah Roman Catholist an rak kan sawm piak tthan hna. Zei ruang ti fiang in theihmi kan ngei lo nain an rak um kho lo i an rak kir tthan. A donghnak ah American in American Baptist Mission an hun phak hi a rak si. Cu ti cun 1899 thawk in Chin ram ah thawngttha len hram a thawknak a rak si. Pathian thawng in atu cu Christian land ti a si cang.