Home 2016 April 01 Pathian Nawlbia le Moses Nawlbia

Pathian Nawlbia le Moses Nawlbia

Pathian Nawlbia le Moses Nawlbia

(Exsodus 19:1-25, 24:1-18, 34:1-35).

Biahmaithi

Kan Bible dihlak hi Nawlbia le Velngeihnak kong chimnak asi. Biakam Hlun le Biakam Thar a um bantukin, nawlbia hlun le nawlbia thar zong an um ve.    Pathian Nawlbia le Moses Nawlbia zong an um. Zuntu tampi le thawngt`ha chimtu tampi zong nih kan thleidan tawn lomi le kan cawh tawnmi cu Pathian nawlbia le Moses nawlbia hi a si. Mi cheukhat le bang nih cun, Biakam hlun hna hi cu a herh ti loh ti  phun   in a chimmi zong kan tampi. Voksa ei lo ding cu biakam hlun a si kan ti lio ah Fir hlah, Lai nawng hlah, siasal bia hlah ti vialte cu biakam hlun an si ve ko tung a herh ti lo kan ti ve ne lai maw?. Zei vial hi dah kan hlawh lai i zei vial hi dah kan cohlan lai ti hi kan i fian lomi tampi aum caah, Pathian Nawlbia cu zei dah asi ti le Moses Nawlbia cu zei dah a si ti hi ca tialtu nih langhter a duhmi cu asi.

Pathian Nawlbia : Pathian nih Moses cu tlaang cung ah khan a vun auh i, ” Israel mi cu, ‘ Izipt mi cung ah ka tuahmi kha nan hngalh; cun mupi nih a fa kha a thla in a cawi bantukin kan cawi hna i ka sin kanphak pi hna kha nan hngalh fawn. Cucaah ka nawlbia kha nan ngaih i ka biakamnak kha nan zulh ahcun, ka mi hrimhrim nan si lai. vawlei hi a dihlak in ka ta a si, asinain, ka thimmi miphun cu nanmah hi nan si lai. Nanmah cu tlangbawi bantukin ka rian a t’uanmi nan si lai i keimah sin i pekchanhmi nan si lai”, a ti tiah chimh hna. Cucu Israel mi cu na chimh hrimhrim hna lai’, a ti. Moses nih Israelmi cu a chimh hna i Izipt ram in an hruaitu hna Patiannih nih khan amah thimmi miphun si le tlangbawi bantukin a mah rian t’tuantu si an dah ahcun kan nawlbia zul hna sehlaw ka miphun an si lai an ti hna nan duh maw? tiah a hal hna tikah Israel mi nih kan duh tuk Pathiam thimmi miphun si cu kan duh a nawlbia cu kan zulh lai anti caah Sinai tlang ah Pathian nih a Nawlbia cu Moses sin ah a pek.

Pathian Nawlbia cu Pathian nih a t’ial : Pathian nih Moses lungtlap pahnih in la law lungtlap ah cun kan nawlbia ka t,ial lai a ti i a mah Pathian nih amah kut bak in Nawlbia pahra hi a t’ial. Moses nih Pathian nawlbia a lak chung ni sawmpi le zaan sawmli chung ah khan Israel mi nih Aaron sin ah Pathian kan ngei ti lo, pathian kan serpiak an ti i Sui Cawfa milem an ser i an rak biak caah Pathian nih Moses tlangcung in t’um cang na mi hna an rawk dih cang lai khih ati. Moses cu milem an biakmi a hmuh tikah a thin a hung tuk i Pathian nih a kut in a t’ial mi Pathian nawlbia t’ialnak Lungtlap cu Moses nih a khuai. An milem cu a khuai dih i, dip tein a rial hnu ah ti a cawh i Israel mi cu adinter hna Pathian thinhunnak ruang ah minung thawngthum nih an thih phah.

Pathian Nawlbia cu Biakam kuang chung ah an chiah ; Pathian cu velngeitu Pathian a si caah Moses sin ah tlangcung ah vungkai than law a hmasa i na lakmi lungtlap bautuk kha la than kei mah nih ka nawlbia cu ka t’ial than lai a ti i Pathian nih a voi hnihnak a nawlbia cu a t’ial than ihnuah ,Biakamkuang chung ah nan chiah lai a ti. Cu caah Pathian nawlbia cu Pathian nih a t’ialmi asi i biakamkuang chung ah an chiah. Pathian nih cu a nawlbia a zul lomi hna dantatnak phunglam le sualthawinaknak phung lam, raithawinak phunglam, tlangbawi hna zulhding phunglam le Civil law kan timi Israel mi hna nih an zulh ding nawlbia vialte cu Moses sin ah a chimh i, a mah pathian nih t’ial loin Moses a t’ial ter. Cu vialte cu, Moses nawlbia ti asi. Pathian nih cain na t’ial lai i bakamkuang chung ah si loin a pawng ah a sir ah na chiah lai ati.

Pathian nawlbia le Moses nawlbia feh ternak : Pathian nih Moses sin ah a pekmi a nawlbia siseh Moses a t’ialtermi Moses nawlbia siseh a dihlak in tlangcung ah cawtum thisen in fehter asi. Nawlbia pahra kan timi hi Moses nawlbia asi lo i Pathian nawlbia asi. David nih cun bawipa na nawlbia bia cu zeizong vialte nakin ka tlaihchan deuh, na nawlbia cu khuaihliti nak in a thlum deuh tiah Sam cauk chung ah vawi tampi at’ial. Jesuh nih nawlbia hrawh awk ah ka ra lo tlamtlinter awk ah ka ra ati. Sihmanhsehsaw bible ah hin hmun tampi ah nawlbia cu cross ah a hrawh dih cang ti vawitampi kan hmuh ve. (Rom 10:4, Col 2:12-16). Cucaah vailam ah Jesuh nih a hrawhmi kha Moses nawlbia cuarpartannak nawlbia, salzuatnak nawlbia, raithawinak nawlbia, teirulchamnak nawlbia tiphun vial te cu a hrawh dih cang i cross ah Judah Jential, nu le pa, bawi le sal ti aum ti lo. Sihmanhsehlaw nawlbia pahra a mah Pathian baknih akut in a t’ialmi cu vawlei donghtiang a rawk lai lo. Asineah ziah Sabath hi kan ulh ne lo?. Ziah Moses nawlbia chung ah a telmi chehra cheukhat le thawhlawn hna hi kan pek peng ne t’ung ti biahalnak aum tawn. Cu kong cu adang tein kan t’ial te lai.

Biatlangkomnak

Cucaah kan cawh loding i ka duhmi cu Moses Nawlbia cu Moses nih a t’ial i Pathian nawlbia cu Pathian nih a mah kut hrimhrim in a t’ial. pathian nawlbia cu biakam kuang chungah an chiah i Moses nawlbia cu biakam kuang sirah an chiah. Patian Nawlbia cu Lung cung ah t’ial asi i, Moses nawlbia cu Savun le caku cung ah t’ial asi. Moses naawlbia cu cross hnu ah cun zulh a herh tilo i patian nawlbia cu vancung tiang in kan zulh lai. Moses nawlbia cu Jesuh rakhlan chung ca lawng a si i Patian nawlbia cu zung zal caah a si. Mah hi kancawh sual ah cun Sathi ei le ei lo kong, Sabath ulh le ulh lo kong, cheuhra cheukhat pek le peklo kong hna ah kanbuai laii fiang tein mi kan cawnpiak kho hna lai lo. Mah hi kan i fain a herh hrimhrimmi asi. Biakam hlun le biakam thar timi capar ah kan fianter than te lai. Bawipa nih thluachuah kanpek piak ko seh.

Rev. Tuan Peng Thang (forum chung lakmi)

Author: admin

Comments are disabled.