Home 2016 April 01 Bible tuanbia

Bible tuanbia

Aug-29-640x420

Bible tuanbia

Baibal kan timi hi Mirang holh in Bible an ti i Greek holh in Biblios an ti i a sullam cu “ca” or “cazual” tinak a si. Baibal chungah”cathiang” timi baifang kan hmuh caan a ummi khi Greek holh in “hagiosgrapha” an tii”cathiang `ialmi” ti can a si i John 5:39 le Luke 24:32 i kan hmuhmi Mirang holh in “Scriptures” ti in a um i “`ialmi” ti caan a si. RCM a silomi Laimi khrihfa tam deuh cu Baibal hi cauk 66 fonh in cauk pakhatkha “baibal” tiah min bunh in a hmangmi kan si. Hi chungah hin biakamhlun hi Hebrew holh in `ialmi hi an sinain Danial cauk cheukhat cu Aramaic holh in `ialmi an um i a dihlak in cauk 39 a si. Biakamthar hi Greek holh in `ialmi an si i a dihlak in cauk 27 a um. Biakamhlun cauk 39 chungah hin phungbia, profet le biazai tiah `hen thum ah `hen a si. Hi `hen thum hi Bawi Jesuh hmurka hrim in a phuanmi Luke 24:44 ah kan hmuh. Biakamthar cu a fawinak in `hen li ah `hen a si. Matthai in John tiang hi thawng`habia cauk an si i Jesuh tuanbia le a chimmi thawng`ha an si. Lamkaltu hi hmasabik Khrihfa tuanbia kong a si. Cun Rom in Judas tiang hi cakuat a si i, Biathlam hi Khrihfa hremnak an in lio caan thapeknak bia an si. Biakamhlun cauk hna hi zeitikahdah an `ial timi hi fiangte in theih khawh a si lo nain BC 1700 – BC 450 karlak ahhin `ial dawh a si. Ahmasa bik Baibal `ialmi cu Exodus 15 le Job cauk khi an si tiah Baibal thiammi nih an ti tawn. Aruang cu an `ialnak cafang zoh tikah a hlun bik I hmanmi biafang aa tel an ti. Biakamthar cauk hi Jesuh khrih thihhnu AD 49 – AD 95 kar hrawng ah `ialmi an si tiah Baibal thiammi nih an chim. I Thesalon hi pawl cakuat vialte ah `ial hmasa bikmi a si tiah zumhmi a si i AD 49 hrawngah `ial a si an ti. Pawl cakuat lakah `ial hmasabik a si pinah Biakamthar cauk chungah `ial hmasabik a si ti a fiang. Biathlam cauk hi Rom siangpahrang Domitian nih hremnak a tuah liopi ah Johan nih thong chungin thapeknakbia a chimmi a si caah AD 94/95 hrawnga`ialmi a si lai an ti.

Izipt siangpahrang Ptolemy Philadephus (BC 285 –BC 246) nih a kut tang i a ummi Judahmi hna relawk ah le a cauk chiahnak inn i Judahmi Baibal um ve awkah Hebru Baibal kha Greek holh in a leh ter hna. Minung 70 nih ni 70 chungah an leh dih. Cu Hebru holh in Greek holh ah lehmi Baibal cu Sawmsarih (Septuagint or LXX) an ti. Greek Baibal ti le sawmsarih ti cu a sawh duhmi ai khat. Cu Greek Baibal sawmsarih timi cu atu Biakam hlun kan timi uk 39 hi aa tel i, cu lengah a dang cauk 14 (Apocrypha) an timi, aa tel rih fawn. ( Hi cauk 14 cu RCM nih cun Baibal ah a pom). Hi ti an leh

tikah atu i kan ngeihmi Hebru Baibal he aa khatlonak tam nawnte a um. Bianabia ah kan Hebru Baibal chung i a ummi Jeremiah cauk le Greek Baibal chung i a ummi Jeremiah cauk cu an i dannak a tam ngai. Zeicahdah an i dan tihi Baibal thiammi nih an hlathlai lengmang mi pakhat a si. Greek Baibal lettu hna hi Baibal leh an thiamlo caah a si hnga maw? ti hna hi ruah awk a um. Asiloah Grik holh i an rak leh lioah hin atu Hebru Baibal in siloin a dang deuhmi Hebru Baibal a um i cucun lehmi a si rua, tiah zumhnak a um. Asinain cu a dang deuhmi Hebru Baibal timi (Masoretic Text siloin a dang Hebru Baibal) cu atu tiangah hmuh a si rih lo. Hi Greek Baibal an leh kum hi fiang tein theih khawh a si lo. Asinain 250 BC in an thok i an dih hi phungbia vial a si tiah an zumh. Cun a dang Biakam Hlun cauk dang vialte hi cu BC 150 tiang a rau tiah zumhnak a um. RCM

nih Baibal cauk 66 pinah an pom chihmi Apocrypha cauk 14 hna hi cu BC chung lawng si loin AD a phanh tiang an chapmi a si tiah zumhnak a um. Zei a si hmanh ah kan Bawipa Jesuh le a zultu hleihnih le hmasa bik Khrihfa nih an hmanmi Baibal cu hi Greek Baibal (Septuagint or LXX) hi a si.Atu i kan ngeihmi Hebru Baibal he hin aa khat lo,aa dang deuh.

Cucaah Bawi Jesuh nih siseh, Paul nih siseh, Peter nih siseh, Biakam Hlun cauk tiah an chim tikah Hebru Baibal (Masoretic Text) siloin Grik Baibal (Septuagint-sawmsarih) hi a si. Cu ti asi caah kan Biakamthar chung i, “Baibal Cathiang nih a ti,” tiah an ti tikah Greek Baibal ‘Septuagint’ an ti duhnak a si tiah theih thiam a hau. Cu kan theihthiam lo ahcun Baibal kan hrilhfiah tikah i palh a fawi te. Vawleicung ah rel bikmi, tambik chuahmi le holhphun tambik in lehmi cu Baibal cauk a si. Vawleicung cauk vialte lakah zuar khawh bikmi cu Baibal cauk hi a si. Vawleicung minung kan dihlak hi Billion 7 hrawng kan si i, Baibal cauk hi Billion 3.9 renglo an chuah cang. Buak tlak in kumkhat ah million 100 lengmang hi an chuah i an zuar. Baibal cauk hi Vawleicung holh phunkip inleh a si i, nihin ni vawleicung holh phun hi 7100 hrawng a um i, mah chungah cun holh phun 2800 renglo in leh a si cang . Holh a thiamlomi hna theihnak thazaang a dermi caah Sign Languages in cauk 55 an leh. Biakamthar le Biakamhlun he lehmi baibal cauk hi UBS(United Bible Society le WBT(Wycliffe Bible Translators) report ning cun holh phun 1715 in leh a si cang an ti . Hlan ah cun Baibal hi mi kip nih rel khawh a rak si lo. A ruang cu Roman Catholic Khrihfabu an i hruainak i an zulhmi dirhmun cu Latin holh lawngin Baibal cu ngeih awk a si tiah AD600 hrawng in an ti. Cun RC siangbawi

lawng nih Baibal cu hrilhfiah awk a si an ti i cuticun kum saupi, kum 1460 chung, cu dirhmun ah cun an dir. Kum 1962 hnu lawngin Pope John23rd hruainak in Vatican Council II ah an mu( Policy) cu an `hen i cu hnu cun mikip nih Baibal cu i ngeih i rel khawh a si thai cang.

Mirang holh in leh hmasa bikmi Baibal cu “Great Bible” a si i, England Siangpahrang King Henry VIII Chan lio 1539 ah England ramah an rak lehmi a si. A voihnihnakBaibal lehmi cu “Bishops Bible” si i, 1568 kum ah an rak leh. A voi thumnak an lehmi “KingJames Bible” a si i England Siangpahrang King James I le Church of England nih 1604 ah leh hram an thok i,1611 ah an lim. Atu kan Lai Baibal hi”Today English Version” ( TEV) in an lehmisi i, kum 1956 -1963 ah Rev.Dr. David Van Bik nih Falam Bible Sianginn a um lio ah Rev.Dr.Johnson he i bawm in an leh. 1963 in Hakha ah a van i `hial hnu, 1963-1966 tiang can tling in Rev.Johnson he Bible cu an leh `han. 1966 kum ah Johnson nih America ah a kir tak. 1977 kum chung hi Rev.Dr. David Van Bik nih a mah lawng in a leh. 1978 kum ah kan Lai Bible cu a voikhatnak cauk 10000 an chuah khawh. 1996- 1998 kum ah CACC le UBS( United Bible Society) hnatlaknak in kan Lai Baibal cu an tharh chuah `han i 1999 kum ah a thar in an chuah `han. CACC rian`uannak thawng in 2013 chungah biafang palhmi tete remhnak an ngeih hnuah Baibal cauk thar in atu tiang an chuah `han lengmang .

The chin time( vol 1. No, 6)

Author: admin

Comments are disabled.